كمك هاي رييس جمهوربه آسيب ديده گان افغان در كويته رسانيده شد

كابل23حوت باختر

هیئت افغانی پیام تسلیت و کمک نقدی جمهوری اسلامی افغانستان را به خانواده‌های شهدا و مجروحین افغان حادثه تروریستی شهر کویته پاکستان تقدیم نمود

به اساس معلومات ریاست اطلاعات و ارتباط عامه  رياست عمومي اداره اموربه آژانس باختر، در اثر انفجاری که به تاریخ 28 دلو 1391 در منطقه هزاره تاون شهر کویته ایالت بلوچستان کشور پاکستان رخ داد، برعلاوه باشندگان متبوع، 37 مهاجر افغان شهید و 74 مهاجر دیگر زخم برداشتند.

حامد كرزي رييس جمهوری اسلامی افغانستان، طی حکمی سفیر افغانستان در پاکستان و نماینده ی با صلاحیت اداره امور و دارالانشای شورای وزیران را موظف نمود تا ضمن رسانیدن پیام تسلیت رييس جمهوری به خانواده‌های شهدا و مجروحین افغان، کمک‌های نقدی جمهوری اسلامی افغانستان را جهت دلجویی از خانواده‌های شهدا و مجروحین اهدا نمایند.

هیئت عالیرتبه جمهوری اسلامی افغانستان به شهر کویته سفر نموده، ضمن دیدارهای رسمی با مقامات محلی آن ایالت و خانواده‌های شهدا، از مجروحین حادثه عیادت نمود. هیئت، پیام تسلیت مقام عالی ریاست جمهوری را به خانواده های شهدا و مجروحان حادثه، ابراز داشت.

اعضای هیئت متذکره، کمک‌های نقدی رييس جمهوری را که برای هر خانوادهء شهید یکصد هزار افغانی و برای هر مجروح پنجاه هزار افغانی تعیین گردیده بود، به خانواده‌های شهدا و مجروحین این حادثه‌ی دلخراش، توزیع نموده گفتند که دولت افغانستان از تمام حقوق مهاجرین افغان در سرتاسر جهان حمایت و دفاع می‌نماید.