ستایش از نقش برهان الدین ربانی در برقراری صلح در تاجکستان

دوشنبه / بی بی سی نیوز / باختر/ 5/ میزان
برهان الدین ربانی ، رییس جمهور پیشین افغانستان ازپایه گذاران صلح تاجکستان محسوب میشود.
این مطلب را ایرکین رحمت الله اف مشاور رییس جمهوری تاجکستان درامور روابط بین المللی در مراسم سالگرد تروربرهان الدین ربانی ، رییس شورای عالی صلح در سفارت افغانستان در دوشنبه پایتخت تاجکستان بیان کرد.
وی گفت:" استاد ربانی خشت اول را در بنای صلح تاجکستان گذاشته است."
به گفته رحمت الله اف ، امام علی رحمان رییس جمهور تاجکستان و سعید عبدالله نوری رهبر مخالفین دولت آنکشور در مدت سه ساعت در تالار ارگ شهر کابل باهم به تنهائی صحبت کردند.
در پایان این دیدار امام علی رحمان به ربانی گفت که با مدد خداوند ج و کمک شما به تاجکستان صلح خواهد آمد.
برای اولین بار رهبران دو جناح مخالف تاجکستان در شهر کابل به هم دست دادند ،که این امر راه را برای ادامه موفق مذاکرات صلح و در نهایت امضای موافقتنامه صلح تاجکستان در شهر مسکو در ماه جون سال 1997 م باز کرد.