کابل باختردمرغومي دمياشتې ٣ :
د افغانستان د اسلامي جمهوريت جمهور رييس حامدکرزي تېره شپه له غلام محمدبلور او د عوامي نشل پارټي له مشر اسفنديار ولي خان سره د جلاجلا ټيلفوني اړيکو په ترڅ کې د خيبرپښتونخوا د يو وزير بشيراحمدبلور د وژل کېدو په خاطر د خپلې ډاډگيرنې او خواخوږۍ مراتب څرگندکړل.
دجمهوري رياست مطبوعاتي دفتر باختراژانس ته خبرورکړ:
جمهور رييس د بشيراحمدبلور له ورور غلام محمدبلور سره چې په اوس وخت کې د اوسپنې دپټلۍ وزير دى او دغه راز د عوامي نشنل پارټي ګوند له مشر اسفنديارولي خان سره د همدردي او غمشريکي دڅرگندولوپه ترڅ کې وويل چې د افغانستان خلک له کلونوکلونو را په دې خوا د دغه شان تروريستي بريدونو قربانيان دي او ستاسو په درد او کړاو پوهيږي.
حامدکرزي په کلکه د دغه تروريستي بريد د غندلو په ترڅ کې د ډيورند دکرښې د دواړو غاړو په مشرانو اوعالمانو بريدونه، د سيمې دخلکو پرخلاف ستره دسيسه او دهغو کسانو کار وباله چې نه غواړي د ډيورند دکرښې د دواړو غاړو خلک د سولې او امنيت په فضا کې ژوند وکړي .
جمهوررييس دبشيراحمدبلور او د دغې تروريستي بيښې د نورو قربانيانو کورنيو ته دلوى خداى (ج) له دربارڅخه دصبر او زغم هيله وکړه.
